Со што се хранат “бесмртните”?

Многу е важно не само тоа што јаде човекот, туку и како јаде. Во ова Јапонците покажуваат неверојатна естетика и неповторлива, со векови негувана уметност на комуникацијата. Се разбира, Јапонија може да се доживува на разни начини. Од една страна, тоа е земја на самураите коишто веруваат во преселувањето на душата и во харикири. Понекогаш се склони и кон лутина, неверојатна итрина и кон идолопоклонство. Но, од друга страна, сето тоа и не е токму така. Тоа е земја на неверојатен старински живопис, филозофска поезија и на чудни церемонии. Тоа е загатлив источен свет во кој се поклонуваат со префинета љубезност, ги сакаат хризантемите и првиот снег, во кој постои и се негува нивниот специфичен поглед на свет.